मुंबई : लेखक, नाटककार, अभिनेता, दिग्दर्शक, संगीतकार आणि गायक अशी बहुआयामी ओळख असणाऱ्या पु. ल. देशपांडे (पुलं) यांनी आपल्या विविध कलांच्या माध्यमातून रसिकांच्या मनावर अधिराज्य गाजवले. आजही ‘पुलं’ नावाची जादू प्रेक्षकांना भुरळ घालते. त्यांच्या याच समृद्ध कलेचा ठेवा ‘स्टार प्रवाह’ प्रस्तुत ‘आनंदयात्री’ कार्यक्रमातून रसिकांसमोर उलगडण्यात येणार आहे. शब्द-सुरांची ही अनोखी मैफल १७ मार्चला दुपारी एक आणि सायंकाळी सात वाजता ‘स्टार प्रवाह’वर प्रेक्षकांना अनुभवता येणार आहे.
या खास कार्यक्रमात पंडित शौनक अभिषेकी, जयदीप वैद्य, नचिकेत लेले, सावनी दातार-कुलकर्णी, चंद्रकांत काळे, मधुरा दातार आणि मुग्धा वैशंपायन या सुप्रसिद्ध गायकांनी ‘पुलं’नी संगीतबद्ध केलेली काही निवडक गाणी सादर करत रसिकश्रोत्यांना मंत्रमुग्ध केले आहे. अभिनेते संजय मोने, आनंद इंगळे आणि पुष्कर श्रोत्री यांनी ‘पुलं’च्या साहित्यातील अजरामर पात्रे पुन्हा एकदा रंगमंचावर जिवंत केली. ‘पुलं’नी संगीतबद्ध केलेल्या ‘वायदा केला’ या गाण्यावर अभिनेत्री आणि नृत्यांगना शर्वरी जमेनिसने ठेका धरत आनंदयात्रीची मैफल संस्मरणीय केली. या कार्यक्रमाचे सूत्रसंचालन मृणाल कुलकर्णी यांनी केले आहे.
या अनोख्या सोहळ्यात ज्येष्ठ दिग्दर्शक जब्बार पटेल, ज्येष्ठ अभिनेते दिलीप प्रभावळकर आणि सुप्रसिद्ध लेखिका मंगला गोडबोले यांनी ‘पुलं’च्या आठवणींना उजाळा दिला.
या कार्यक्रमाविषयी सांगताना स्टार प्रवाहचे कार्यक्रम प्रमुख सतीश राजवाडे म्हणाले, ‘आनंदयात्री हा फक्त कार्यक्रम नसून ती एक परंपरा आहे. हीच परंपरा अखंड जोपासण्याचा ‘स्टार प्रवाह’चा प्रयत्न आहे. ‘आनंदयात्री’च्या या प्रवासात अनेक दिग्गजांच्या कारकिर्दीला उजाळा देण्यात येणार आहे. महाराष्ट्रातल्या दिग्गज कलाकारांना यानिमित्ताने मानवंदना देण्यात येईल. शब्द-सुरांची ही अनोखी मैफल प्रत्येक मराठी माणसाच्या मनात आणि घरात जागा बनवेल याची आम्हाला खात्री आहे.’
